بالريموت

 

 تليفزيون ..ريموت كونترول في إيدها ...هيه قاعده علي كنبه قديمه بس شغّاله ...الكنبه في أوضتها .الاوضه مش

صغيّره أوي بس أوياها

بتتفرّج علي فيلم هيه صورته مش واضحه لحدإلا ليها هيه بس ...ماهو تليفزيونها بقي ...لكن هيه صورتها واضحه اوي ،

في الاول كانت بتضحك وشويه ,ضحكت أوي شويه كمان وصوت ضحكها بقي يسمّع بره أوضتها ،

شويه وباب الأوضه اتفتح ودخلت منه رأس ست كبيره شكلها والدتها.. لا فعلا دي والدتهالانها لما قالت للبنت صوت ضحكتك عالي البنت قالتلها معلش ياماما اصل الفيلم حلو أوي تحفه تعالي اتفرّجي معايا راحت الام قايلالها انا مش بتاعت أفلام انا عايشه الواقع ....

.سكت الكلام ....خرجت الام

ورجعت البنت للريموت كونترول علّت صوت التليفزيون غطّت علي كلمة امها انا مش بتاعت أفلام وثواني والضحكه عليت علي وش البنت والقهقهه ملئت الاوضه وتلاشي صوت الام

دقائق طويله من الضحك المتواصل لدرجه ازدحمت بيها الاوضه الصغيّره

لكن ثواني واتغيّر شكل الوش والضحكه اتخنقت والانفاس عليت واتجاه العين اتغيّر كان ادامها باصص للتليفزيون ....دي بقت بصّالي انا ..اصل انا علي يمينها لكن ثواني كمان وزاوية العين حادت عنّي شويه ......

اااااااااااااااه دي عنيها راحت ع المرايه اللي جنبي ،بصلتها شويه كده وقالت: نفسي اناااااا ....آسفه ع الإزعاج

حوارات ضغط دم

تحاملت علي نفسي اقعد علي الكمبيوتر عشان اسجل حوارات بتدور في عقلي وقت المرض وباحسها بتدور في عقول كل من يشعر بالمرض نسال الله العفو والعافيه والمعافاه في الدنيا والاخره

حبدأها من اخر حوار دارجوايا ألا وهو 

الحوار الأول الناس... 

اهتمامهم وسؤالهم عن المريض أد إيه بتخليه  للحظات ممكن يفرح بمرضه عشان بيبان أوي  في المواقف ديه ناس الواحد مش بيبقي بيفكر انهم ممكن يهتموا بيه لو غاب حتي ولو عن صفحات الفيس بوك :) يسالوا عنه ولو عرفوا انه مريض  يسألوا عنه بقي أكتر

غالباالواحد وهوه مريض بيبقي مش قادر يتكلم او يقعد علي كمبيوتر عشان يتواصل مع الناس اللي عايزه تسأل عليه اخواته واصحابه واخواته ف الله وحتي اللي علاقتهم بيه مجرد في لستة الفريندس ع الفيس بوك لكني كنت ببقي سعيده جدا بسؤالهم  وكان بيكلفني كل يوم ادخل نت من علي الموبايل لاني مش قادره اقعد ع الكمبيوتروانا بقي فودافون وماادراك بدخول النت من علي فودافون وسعر النت من علي فودافون:)

حقيقي وقت الشده بيظهر الرجال اللي عايز يودّيك للدكتور واللي بيديك نصايح واللي بيجيلك واللي خايف عليك ومفتقدك بجد

سعيده اوي بالرجاله اللي لقيتهم جنبي وخاصة ان الضغط ده بالذات بيتأثر بالحاله النفسيه ووجود الناس له اثر كبير علي الحاله النفسيه

فالحمد لله علي نعمة الناس اللي بتقدر بجد في الدنيا قليلين

ثاني الحوارات المرض والراحه

زمان كان الواحد مابيصدق يعطس عطسه او يدفي شويه ولو بفعل حراة الجو او اي حاجه بسيطه عشان يقعد في البيت ينام ويرتاح ومايروحش بقه لادروس ولا مدرسه

ومكنتش اتصور ان الدنيا ممكن تغيّر ده للعكس تماما ويبقي الواحد بينعي هم التعب عشان مش عايز يقعد في البيت ولا يسيب مسؤلياته اللي سعيد بيها وتبقي الاسره والمقربين بيتحايلوا عليه انه يقعد في البيت ويرتاح عشان المرض يروح لحاله لكنه بيسمع من هنا ويطلّع من هنا حتي وان تعرّض للتعب اكتر لو نزل لكن سبحان الله دنيا مابتستناش علي حال

ثالث حوارات المرض

المرض راحه

أحيانا بقي المرض بيكون راحه للهروب او بمعني اصح لترييح الدماغ من غلط الواحد بيكون بيشوفه ومش قادر يتكلم فيه او بيشوفه لكن مش عايز يتكلم فيه او لاي سبب من الاسباب مش عايز يتكلم فيه فبيبقي المرض فرصه انك تسكت ........وحقك طالما مريض انك تسكت

وكمان احيانا بيبقي فرصه ان الناس تخف عنّك اللي ممكن يضايقوك بيه وانت سليم او ظاهر ادامهم انك سليم

ومحدش يستغرب من اللي مكتوب في اول التدوينه عن الناس وعن اللي مكتوب دلوقت لان الناس كده فيها اللي جنبك وفيها اللي بيدوس فوقك حتي ولو من غير مايحس وفي وقت المرض بقي بيظهر الاتنين 

رابع حوارات المرض

الالم

يمكن تكون ديه أول حاجه بيحسها الجسم واخر حاجه بيدركها العقل لان اول ماالواحد بيشعر بمرض بيقول اه انا تعبان!!!!

وطبعا كلنا بنقول كده ولكن قلما أدركنا بعقولنا حقيقة المرض حقايق كتيره اولها مين السبب في مرضي انا ولا حد غيري ولا مالوش سبب وده ابتلاء كده او اختبار من ربنا معنديش كلام اقوله لان كل واحد له ظروفه الخاصه أكيد فيه مننا السبب في مرضه هوه نفسه واكيد مننا اللي سبب مرضه حد غيره بسبب عدوي مثلا او حزن علي وفاة شخص عزيز أو....أو.....أو... واكيد افضل انواع المرض هو اللي بيكون اختبار من ربنا للصبر والشكر وعدم السخط من قضاء ربنا ساعة ما الانسان بيدرك بقي ان ديه الحكمه من المرض المفروض يكون في غاية السعاده لان ربنا فاكرني وحابب يكفّر ذنوبي وفي النهايه اكيد بعد كل  محنه منحه 

وحوارات تانيه كتيره بتدور وحتدور الي يوم الدين ولكن في الأخير نسأل الله العفو والعافيه والمعافاه في الدنيا والاخره

وحاليا مضطره ارجع فراش المرض تاني لانه بيبقي الاقرب للانسان في هذه المرحله:)

عافانا الله جميعا منه ورزقنا الصحه وحسن إغتنامها

اللهم اشفينا واشفي مرضانا ومرضي المسلمين الي يوم الدين

ليله في حضن العيله

أول مره من كتير أحس إني رجعت طفلة تاني  طفله في وسط عيله كبيره وكتيره أوي كنت بحسها زمان أكبر عيله في الدنيا من كتر مابشوف أجيالها جيل الجدود وجيل الاباء والاعمام والعمات والأقارب وأقارب الأقارب وجيل المتزوجون حديثا وجيل الشباب وجيل الأطفال آخر جيل عشت فيه لمة العيله الدائمه  في وسط البيت الكبير في بلدنا اللي كنت زمان فاكره ان اسمها البلد لان كل حد من جميع أفراد العائله في جميع المحافظات دايما يقولوا رايحين البلد والبلد كانت هيه معني الوطن الصغيّربأفراحه وأحزانه ومشاكله 

يبدأ يومنا بالفطار ع الطبليه بالرغم من وجود السفره ولكن ديه طقوس لازم الطبليه وأكبر حجم طبليه شوفته في حياتي وطبعا عشان يساع جزء من العدد ده وبدل الطبليه 3 إلي جانب السفره للي مابيعرفش ياكل ع الارض واللي اتعلمت منهم العاده ديه 
وطبعا الأكلات الرئيسيه الفول البيتي والبيض المقلي والعيون والبطاطس المحمره وطبعا طبعا طبعا الجبنه الحادقه جبنة البيت والجبنه البيضاء والقريش والرومي ومخلل الباذنجان إللي ماكنتش بحبه لكن طقس م الطقوس مع الرقاق الطازه والقرص أو زي مابيسموها البكاكيم والعيش البيتي وكنا  نهارنا لعب أدام بيتنا الكبير الكبير بحجمه وبعدد زوّاره وسكّانه وتنقلات بين بيوت أهالينا في البلد

وييجي وقت الغدا الوقت المقدّس تتلم العيله تاني علي ال3 طبالي والسفره وشوية أطفال صغيرين أوي مع امهاتهم كل واحده واخده جنب بطبق ابنها تأكّله وهوه بيعافر عشان يلعب وكالعاده اليوميه لازم الطبالي والسفر لاتخلو من السمك المشوي لان فينا اللي مش بياكل غيره وطبعا برمةالرز في الفرن الطين وشويه وبقي في فرن الغاز وبجوارهم الأكل المختلف يوميا بقي 

وأما ليلنا فأوله مع شابات العيله في المطبخ رايح جاي ع الاوضه جنب باب البيت أوضة الصالون عشان عمايل الشاي والقهوه والينسون والكركديه السخن والحلبه لآبائنا وأعمامنا وأصحابهم إللي جايين عشان يسهروا معاهم ايام تواجدنا وفي الغرفه التانيه نفس اللمّه لكن لشباب العيله اللي جايين برده عشان يسهروا مع إخواتنا الشباب وأولاد الأعمام وغيرهم وإحنا ع المطبخ رايح جاي

وساعات زنهارات جنب كبار العيله والجيلين الكبار نسمع حكاوي الزمن الجميل حكاوي وأساطير وووو  

لحد مانناااااااااااام ع الارض من كتر التعب ننام وسط الحكاوي و نحلم بينا جوّاها

ولما كبرنا شويه  كنا نسهر للفجر ع الكوتشينه وتقليد الكبار ع الدومينو واللي اتعلمته من صغري 

حتي أيام حالات الوفاه كنا واحنا صغيرين بنعتبرها حاجه حلوه مش عارفين يعني ايه موت لكن اللي نعرفه اننا بنتجمّع والبيت  بيتملي اينعم بلبس اسود لكن معاه أطفال العيله ما الطفل مش بيحزن زي مابيقولوا كنا نشوف البكاء ونزعل للي مات لكن ولان العدد كبير ماكنّاش بنحس أوي ان الدور دوّاروالكتير بكره يبقي قليل

وتحلي الليالي لما تيجي المناسبات ليلة فرح ليلة عيد سهر بقه للصبح وكان احلي حاجه بنفرح بيها لما يسهر الرجال الكبار في الشارع أدام بيت العيله للصبح لعب دومينو وشطرنج وكوتشينه وكلام وحكاوي واحنا م البلكونه نسهر نتفرّج عليهم كانت سعاده مابعدها سعاده لكن كان يقطع سعادتنا دمعات عين للأمهات في ليلة الفرح ماكنّاش فاهمين إيه موقعها م الإعراب معقوله بيبكوا في ليلة فرح والعيله كلها اللي يمكن عددها 100بيتين في بيت واحد والباقي في باقي بيوت العيله معقوله بيبكوا 

ماكناش ساعتها عارفين ان سبب البكاء ده ان حد الصبح حيفارق البيت وواحده بواحده يقل حد م البيت اللي جامعنا وإحنا حلمنا كان فستان جديد وتسريحة شعر وصوره جنب العروسه وزياره في بيتها الجديد الجميل

ماكنّاش نتصوّر ان حييجي علينا الدور وندمّع لما ندخل البيت الكبير مانلاقيش بقي فاضل فيه غير 7 بقوا 7 والنهارده رغم سعادتي اللي لا توصف اني رجعت ف كام ساعه للمة العيله تاني اينعم مش ف البيت الكبير ومش ف البلد لكن مع العيله في فرح آخر جيل اللي كانوا جيل الاطفال بعد مابقينا احنا جيل الشباب واختفي جيل الأجداد

النهارده البيت بقي فاضل فيه 6 ومنهم كمان فرد متغرّب يعني مش موجود غير في الأجازات ويمكن ييجي اليوم ويبقي البيت الكبير يدوب مش فاضل فيه غير 2 

بس الجميل ان اللمه مش بيت واللمه مش بس ذكريات حلوه اللمّه بيوت تانيه اتفتحت وعيال كتير اتولدت وبقينااحنا دلوقتي اللي كنا أطفال بقينا طنط وعمو وخالتو وخالو وعمتو وعمو إتفاجإت النهارده اني بقيت خاله خلاص الطفله كبرت وبقي عندها ولاد إخوات كتير وبيدأوا يقولوها ياخالتو وياعمتو رجعت لجو طفولتي وعيلتي الكبيره وأفوق علي طنط وخالتو وعمتو بتتقاللي سبحان الله

يااااااااااااااااااااااااااااااااااااه 
أجمل سنين العمر مرّت أدام عنيّافي حضن لمّة أحلي عيله م البحيره واسكندريه والقاهره وكفر الشيخ أجمل  ذكري وأجمل ليله 

ليله في حضن العيله

الغاليه

   قال: ((إن رجلاً زار أخاً له فى قرية أخرى، فأرصد الله له على مدرجته، ملكاً فلمَّا أتى عليه قال: أين تريد؟  فقال: أريد أخاً لي فى هذه القرية. قال: هل لك عليه من نعمة تَرُبّها؟ قال: لا. غير أنى أحببته فى الله عز وجل، 

قال: فإنى رسول الله إليك بأن الله قد أحبك كما أحببته فيه))  

حالة حب في الله

هيّه حاله معرفش جاتلي منين ولا إيه سببها 

بس حاله م الحالات إللي الواحد مش بيحتاجلها علاج بالعكس ده يتمنّي يعيش فيها عمره كله لانها أجمل حاله شافها عمري كله لحد دلوقت وإيه أحلي من حالة الحب بالشكل ده

(حب في الله)

 إللي بحبها؟؟؟

هيه جنوني وبرده شجوني

هيه رفيقة عمر ولوني

هيه ف ظهري تمللّي ف عوني

لو حكتب  أشعار الدنيا

مش حتكفّي ولا حتوفّي

قيمتها في قلبي

هيه الضيّ لعيني وقلبي

هيه البلسم لحظةجرحي

هيه دي نعمة ربي عليّه

هيه الطيبه والحنيّه

هيه الإيد إللي بتتمد 

إيد بتطبطب مش بتهد

عايزه أقولها إني بحبها

وإني وفي أخرتي نجدتي حبها

دي إللي بحبها

نرجع ونقول ع الحاله ديه كلام مش حيوفّيها حقهاطبعا ولكن حيعبّر عن جزء من أقدار ربنا وترتيبه

طول عمري بسمع حديث سبعه يظلهم الله بظله يوم لاظل إلا ظله ......اثنان تحابا في الله اجتمعا عليه وتفرّقا عليه

ومن ست سنوات بالتمام كنت بعتبرالحديث كده بقي موجودبالنسبالي وأحسبه كذلك لكن  حلاوة إني أعيش الإحساس ده وأفهمه عملي وأحس إني مطمئنه من حر يوم القيامه وأسمع مصطفي حسني وهوه بيتكلم عن الاخوه في الله وانا مبتسمه وحاسه اني أسعد الناس وعايزه انا اللي أنزل مكانه واحكي عن الاخوه ف الله فلم يكن إلا من أكترمن 3 سنوات بشويه لما طلّت علّيا كده من غير مقدمات من وراء تعب بالمعده حسّت بيه وإحنا في إجتماع خلاّها تروّح بدري أصلنا في عمل تطوّعي واحد وكانت لحد التعب ده أبعد الناس عني وماأعرفش ليه!!!!!!!!!!!!!!!!!!

روّحت لقيتني بدون أي مقدمات بمسك سماعة التليفون أسأل عنها وبمنتهي الحب اللي معرفش كان ليه مع إني بعيده عنها خالص قابلني صوتها!!! والاهم بقه انها اهتمّت بتفكيري واتفتح حوار عني واهتماماتي وانتهي الحوار بإسم كتاب حتخّلي شخص ما فاكره إسمه طبعا يجيبهولي 

ومعرفش إيه اللي حصل بعدها؟؟؟؟؟؟؟

قال تعالى: ﴿وَأَلَّفَ بَيْنَ قُلُوبِهِمْ لَوْ أَنفَقْتَ مَا فِي الأَرْضِ جَمِيعًا مَا أَلَّفْتَ بَيْنَ قُلُوبِهِمْ وَلَكِنَّ اللَّهَ أَلَّفَ بَيْنَهُمْ إِنَّهُ عَزِيزٌ حَكِيمٌ ﴾

بقت روحي اللي عايشه في جسد تاني روحي إللي بعبد ربنا بيها بقي يحلالي الصلاه ويّاها والدعاء أجمل وأصدق دعاء إللي كنا بندعيه في نفس اللحظه وكنا بنوصل لدرجة إننا بنتفق في الركعه الأولي حندعي بإيه والركعه التانيه حندعي بإيه وبين ركعات أجمل تهجد كنا نرن لبعض وندعي أحلي دعاء دعوته في حياتي

هيه رمضاني ماينفعش رمضان من غير جدولنا الخاص صلاه ودعاء وصدقات وذكر وأفكار خاصه إبداعيه عمري ماشفت الابداع في العباده إلا معاها

دايما هيه إللي بتطمنّي إني مهما بعدت عن ربنا لازم حيرجعني ليه تاني ماهو وعدني علي لسان حبيبه انه حيظلنا بظله يوم لاظل إلا ظله وأنا لو مش حصدق نفسي فحصدق نبييّّ صلي الله عليه وسلم

هيّه الأمل يمكن ماإسمهاش أمل بس هيه أمل 

أما بقه في الحياه العامه فهي الحضن إللي وقت ضيقتي لازم أجري عليه حتي ولو مش حكيلها كفايه إني أروحلها

وطبعا أصلا أنا مش محتاجه أحكيلها أي حاجه هيّه بتعرفها لوحدها

الغريب إنها لحظة ضيقتي لازم ألاقي تليفوني بيرن ألاقيها بتقولي مالك أنا قلقت عليكي إتصلت أطمن ,والله ده الطبيعي بتاعها مش بعرف أداري عليها حاجه لاأدامها ولا حتي من وراها لازم تتصل وهيه عارفه اني فيا حاجه تتصل بس عشان جالها احساس اني فيّا حاجه
وهيّه كده مع الكل وده إللي بيخلّيها قريّبه من أي حد يعرف حتي إسمها 
وحالي معاها نفس حالها معايا وقت مايطرأ عليها أي طارئ معرفش إيه بيحصلّي لازم قلبي يوجعني وألاقيني بكلّمها أو أدامها في بيتها

هيه اللي دموعي بتنزل أدامها براحتي

هيه أمي وصاحبتي وأختي

أنا أكبر منها سنا في شهادة الميلاد لكن هيّه القلب الأكبر والعقل الأكبر هيه اللي بتحتويني ,هيّه إللي بتكبر أحلامي معاها هيّه الأمان إللي فاضلّي في الدنيا مع أهلي إللي من دمي ماهيّه برده أهلي دمها مش في عروقي لكن روحها بتسري جوايا وقت ماأفقد روحي وأمشي  بروحها هيّه
هيه الجبل بجد ماينطبقش عليها غير لفظ جبل لكن اللي يفرقها عن الجبل إن جوّاها ألام تهد الجبال لكن هيه جبل مش حينهد أبدا أبدا وجوّه الجبل صخور لكن جوّاها قلب كبييييييييير وضعيف أوي أدام إللي يحبه
أقداري معاها مش طبيعيه خالص دايما جامعنا شئ غريب كإنه رباط خفي طرف عندها وطرف عندي دايما أقدارنا مربوطه ببعض برباط من عند ربنا

يوم إمتحانييييييييي:-

اليوم كان صعب جدا تقريبا ماذاكرتش حاجه والساعه كانت 1 الظهر والامتحان الساعه 5 إتوترت ماذاكرتش ومش قادره أذاكر أعصابي بدأت تنهار بمعني كلمت تنهارسبت المذاكره ومن اليأس فكّرت إني ماأدخلش الإمتحان وأعصابي بااااااااااااظت لكن إستهديت بالله كده وقولت حقوم أصلي الظهر واعمل شوية ريلاكسيشن كده وأرجع الساعه 1 وربع بالظبط وحطيت جدول كده يدوب ع الوقت اللي فاضل ع الامتحان بالثانيه واتجهّت للوضوء وفجأه ضرب جرس الباب قولت بس ده حد جيّ يعني خلاص مفيش مذاكره الماده ضاعت عليه العوض وماكانش فيه غيري في البيت طبعا انهارت وتمالكت نفسي عن البكاء بالعافيه عشان أشوف مين ع الباب


ويطلع مين؟؟؟؟؟

تطلع هيه!!!

جايه ليه؟؟؟؟؟؟

جايه تدّيني .........وردهّّ!!!!!!

قالتلي !!!!!مش مشكله قالتلي إيه لكن ربنا بعتهالي عشان أتحوّل من حال لحال واتحولت حالتي لحد مليان طاقه وبفضل ربنا ثم هيّه حليت كل الماده وكل الحل الحمد لله صح مش عارفه ازاي بس اللي أعرفه إنها السبب 
وده حالي معاها دايما
 دايما بقولها أنا إختارت كل أصحابي لكن إنتي إللي ربنا إختارك ليّا
ومهما حكيت حكاياتي معاها مش حقدر أحصرها لانها يوميّه وكلها أكتر تأثير من بعضها 

ولكــــــــــــــــــــــــــن

آااااااااخر نوادرنا المأسويه :-

يوم ولادتها لابنها الجميل وساعة ولادتها قدّر ربنا إني ماأعرفش إنها بتولد مع إن كل إللي حواليا كانوا عارفين وسبحان الله يمكن يكون عشان تحصل المفارقه ديه
وقت ألامها قبل الولاده حصلّي شدّه جامده جدا جداعلي أعصابي خلاّتني أتألم ألم شديد ألم خلاني أمشي في الشوارع حاسّه إني بتخنق وبموت وسبحان الله في الوقت ده كان نفس الشعور بالألم بيراودها .... ألام الولاده
لكن الساعه 5 بالظبط والغريب إني ساعتها صدفه بصيت في ساعتي.
في اللحظه ديه سكن ألمي وهديت فجأه وللقدر الساعه 5 بالظبط سكن ألمها وولدت 
وفي نفس اللحظه ديه ومن غير ماأعرف إنها ولدت بدأت أقرأ سوره من القرآن الكريم بإسم إبنها!!!!!!
لحظه ماوصل إبن الغاليه للدنيا كنت بقرأ سورةيوسف

بحب أوي أم يوسف وحبيت أوي يوسف ومستنيّه أشوفه بيكبر ويكون أجمل إبن أخت في الدنيا كلها 

 أختي في الله 

إللي بقولها
لو أقدر أغنّي كنت غنيتلك أجمل أغنيه في الكون كله لكن
بهديكي أجمل مشاعر مكتوبه ومتلحّنه سمعتها عن الصاحب 

في الدنيا صاحبك لنور الحق بيدلك..........مش اللي ساحبك في وسط التوهه بيضلك

يفتح ببانه اذا الابواب حتقفلك................دايما فاضلك كضلك ف الطريق علي طول

عايزك ياصاحبي في وسط العتمه قنديلي.......وف سكة الخير رفيقي وضلي وسبيلي

وتكون دليلي ولما أتوه تناديلي..................وفي يوم رحيلي بتدعيلي أكون مقبول

 

دي كانت قصّتي الواقعيه وبعرضها كمثال عن حاجه حلوه ونتيجتها أحلي
إيه في الدنيا يساوي إن الإنسان يلاقيله أخ من ربنا ؟؟؟إللي بيرعي علاقاتهم ربنا , علاقتهم عشانه وهوّه محورها 

إيه أجمل من قلب يحبك عشان ربنا مش عشان محتاجك ولا واخدك سكّه لدنيا حلوه

الاخوّه في الله سكه لآخره حلوه وبالطبع الدنيا بتبقي معاها جنّه 

الأخوه في الله كنز قلّ من يجده مع إنه بالساهل  ويستاهل 

فهو يوجب محبة الله ويحجزلنا منابر من نور حول عرش الرحمن 

قال الله تبارك وتعالى: وجبت محبتى للمتحابين فيّ، والمتجالسين فيّ، والمتزاورين فيّ، والمتباذلين فيّ 

       وفي الحديث القدسي: "المتحابون في جلالي لهم منابر من نور، يغبطهم النبيون  والشهداء" 

يلا بقي إلقالك حد 
دوّر عليه ولو بإبره

أسئله وأجوبتها عندنا

لان كل واحدفينا مش عايش  في الدنيالوحده محتاجين كل واحد فينا يعرف  إخواته في البشريه بيفكّروا ازاي 

يعني لماالواحد يفكر بشكل جديد أو بمعني أصح غريب علي المجتمع حيلاقي الكل يقول ده مششششش معقول ده عايش الوهم وحيفشل ده بيفكّر غلط ومش بيسمع كلام حدولا حيلاقي في البشريين إللي زيه ناس تقول كلام شبهه وتأيده حتي ولو مش حتكون هوّه

عشااان كده

إمتحااان نمتحنه لنفسنا أجوبته إحنا وسطور ورقة الإجابه بتحددطريقنا

س1 : ياتري الأمل ينفع يكون موجود دايما من غير سقف له

ولاّ لازم حتي الآمال يكون ليها حدود تحدّهاوتبقي الأحلام أحلام عاديّه يعني؟؟؟؟

وطبعا المقصود بده الآمال قابلة التحقيق مش يعني أعيش ع القمر وإن كان والله يمكن ييجي اليوم مين عارف!!!!

س2:هيه الآمال لازم تكون معقوله في دنيا البشر ولاّ ينفع تكون غير عاديّه وغريبه بالنسبه للناس ؟؟هيه مش أحلامي أنا طيب تبقي مناسبه لكل الناس وعاديه ليه؟؟

يعني معقول اننا نعمل اللامعقول بالنسبه للبشرولا ده يبقي مش معقول؟؟؟؟

س3: لو معقول نعمل اللا معقول ممكن لدرجة إيه نقدر نعمل كده وبعد أي درجه مانقدرش؟؟؟؟وضّح بمثال ولكن غير عادي:)) 

وقبل ماأشوف إجاباتكوا حبدأ وأقول

 عفوا يازماني وعفوا يامجتمعي الكريم أنا مش عادي ومش حكون عادي ومش حعمل اي حاجه عاديه حعمل ان شاء الله كل شيء غييييير عادي

لاعايزه أكون عادي بنت عادي ولا ابني يبقي عادي ابن عادي وعاديّه وده الأفضل ليكوا وليّه

منتظره تعليقاتكواواجاباتكو الغير عاديّه

حوار بين الورقه والقلم

نفس الحوار الدايم بينهم بيتكرر لكن المرادي مش عنهم ولكن عن اتنين تانيين

عن إنسان أو شبيه بإنسان وبين حتّه منّه الطبيعي إنه يحبها ويدافع عنها لانها منه لكن الحقيقي واللي بيحصل انه بيخاف منها ودايما يتهمها انها السبب في تعبه وإنها بتدورله علي إللي يتعبه وده غالبا لان الحته ديه بتكون بتفكر في أي حاجه وكل حاجه في الدنيا وتقدم تنازلات وتضحي وتضحي عشان أي وكل حاجه إلا صاحبها ده

يعني ده التفسير اللي كتبه القلم علي صاحبتنا الورقه والله أعلم بقه الكلام ده صح ولا ايه والقلم جابه منين الله أعلم

لكن مش يمكن يكون حقيقي الحته ديه أذي لصاحبها 

لكن لو صدقنا كلام القلم يبقي ربنا خلقها ليه أكيد ليها وظيفه غير تعب صاحبها

مش يمكن الحته ديه هيه وخاصة لما تتعبه أوي تفتحله فرص يبدع مش بيقولوا من الألم يتولد الأمل مش من المفترض الإبداع وليد المحنه وأحيانا الشجن

شجن......يعني إيه شجن؟؟؟

القلم ده بيكتب حاجات غريبه ومش مفهومه خاااااااااالص غير ليه لكن بما إن الورقه ساكته بالشكل ده  إذن أكيد هيه فاهمه وعامة أهو حوار بينهم ومالناش دعوه

وتحياتنا للورقه والقلم

محدش يقول لحد ...ده كلام في سرّي

أنا  مش لبانه

أنا وأفتخرإنسانه

لو مستسهلني لبانه

خليني أقولك  حاجه

بس صلي ع النبي

أنا عارفه إن اللبانه

حلوه في طعمها

سهله في مضغها

ولـــــــــــــــــــــــــــــــــــــــــــــــــكن

حبّه وراح تدخل في مكان التسويس

وحتوصل لدماغك وتزيد في التشويش

أولها حلو  أخرها مر

وحلها الوحيد تشيل الضرس خالص

مش كان أسهل ياحدّ نتكلّم نتخالص؟؟

تشوفني وتواجهني

مش مضغه وتستسهلني!!!!!

لوخايف من إيه ؟؟؟

لو شايل علي إيه ّّ!!!

ركزلي وإرمي اللبانه

واجهني بقي كإنسانه

دي نصيحه ومنّي بقولهالك

أه بس إستني

 فيه حاجه مش ضامنهالك

ترجع تلاقيني بكلامك فرحانه

 ماخلاص جبرت

أصل  أنابردك بردك إنسانه

كررررررررركبه

م الدنيا الشكل إتغيّر

عجّزت وسنّي صغير

دايساني الدنيا برجليها

مش حاسس فرحه ف معانيها

محتاج للحاجه اللي تحسسني

بعنواني وانا ايه فيها

أنا فيها عجوز وخلاص

ولا انا كتلة إحساس

ولا انا ماشي وحاضن أحلامي ومداريها

خايف للناس تشوف الاحلام تطمع فيها

مهموم م الدنيا اللي بتتغيّر وأنا ثابت

أحلام للبيع أخلاق سابت

حتسيبني الدنيا أنا علي حالي

ملبوخ متكركبه أحوالي

ولا المستقبل جاي أجمل

أستنّي الفرحه أنا وأستحمل

ولا دا حلم جذوره عنيده

وإيد الفلاح عنّه بعيده

ماأقدرش أسيبك حلمي

تاخدني بعيد

وأسرح بخيالي

ف غنوة ليلة عيد

وبدال الليله 

أستنّي ليالي 

يهل هلال العيد

قبك وطن......

اسكت ياقلبي بطّل تدق

قوول أه ولأ

للصح أه للجرح لأ

اوعي المشاعر تخدك لتحت

تتعب تلاقي نفسك وقعت

تطلبها ناجده

تلقاها ساجده لرب وعصيته

تندم وتحلم قلبي ياريته ماكان ألمني

والحق انت محقوق لجرحه

هددت حلمه عزّزت فرحه

خليته دابّه 

ساحباها شابه

مجرور وراها

لدروب متاهه

خليته شقه

مسكونه حبّهِ

وف يوم وليله

بقي للإيجار

مابقاش وطن للإنتماء

أصبح وطن للإتجّار

مخنوقه الضحكه جوّايا 

وبتشوفها الناس

علي وشّي سراج ونّاس

جوايا صرخه مكبوته

وف جوه قلبي منحوته

لاففها القلب من بره 

مغلفها بحدود مره

ولو دمعه حتنزل مني أخبيها

وبرسم ع الشفايف بسمه تخفيها

ساعات أرسمها تكشيره تداري الآهه والحيره

تحسدني الناس علي عقلي

محدش داري بالغصه

وبالضيقه وبالحسره

ووقت الفرحه تلجألي

تشوف مني الهنا ألوان

وف القلب الجراح ماتبان

أداري وجعها بإديا

وأقيّد صرختي فيا

آجي أستنجد أنا بقلمي

يحرر صرختي وألمي

ف وقت ف ثانيه يرحمني

وأوقات تانيه بيخوني

وبتلجّم كمان وكمان 

تخوني اوراقي والاقلام

ورق خالي وقلم نعسان

وبيقرب علي انه ينام

ويوم مااستغني انا عنه

يطير الجاف من سنه

لايقدر يرسم الضحكه

وللصرخه يكون سكه

وتفضل صرختي فيّا

وترجع دمعتي عنيّا

وتعلا الضحكه وبقوّه

تداري اللي اتحفر جوّه

نقول ح يقولوا مش

بقالنا 6 سنين عمالين بنقول حنقدر نغير حنقدر نطور حنقدر نفكر حنقدر نقرر حنقدر نحط لنفسنا أهداف ونحققها حنقدر...حنقدر....حنقدر......

لكن إللي ماكناش عاملين حسابه إن تطلع حملة مضاده ....الرساله التسويقيه بتاعتها مشششششششش حتقدر

الأولي والبدايه

مع روتانا سينيما مش حتقدر تغمض عينيك

عشان خلاص روتانا سينيما حلفت علي الجفون وعضلاتهاوعلي الرموش وحركاتها إنها ماتغمضش أبدا عشان حتي لو حاولت مش حتقدر

وإحنا طبعا عضلاتنا مابقاتش طوعنا لأ بقت طوع الإعلام

وسلام للإعلام الهادف

التانيه والتالته والرابعه وال......

فهي إن كل مانروح ف حته بقت كلمة مش حتقدر سمة العصر وكل عصر حتي إنها وصلت لعربيات الكبده خلاص بقت مع روتانا كبده مش حتقدر تقفل بقك

وياااالبشاعة هذا المنظر تخيلوا الناس كلها تمشي فاتحه بقها مش عارفه تتحكم فيه مش عارفه تقفله أكيد منظر شنيع حتي البق معقول مانقدرش نتحكم فيه ونبقي أصحاب كروش واللسان طوله بعدد البني آدمين إللي أكلهم....صوره غير واقعيه خااااالص

ومع روتانا صور مش حتشوف حاجه خالص

 

ع البيانولاّ

ع البيانولا الناس ملمومـــــــــــه

النـــــــــــــــــاس مهمومـــــــــــه

وصوت بينادي وصوت مزيكــــا

داخللــــي مـــــــــن البلكونـــــــه

قــمـــــــــت جريــــــــــــــــــــــت 

ع الســــــــور شبّيــــــــــــــــــت

شوفته بصوته بصورته بلبســـه

ومعــاه إبنه وقاعـديــن يحكــــوا

اشي غنيـــوه واشـــي حكيــّـــوه

تحكي حكايــة شعــب أصيـــــــل

شــــعــــــــــب جميــــــــــــــــــل

بــــسسسسس بيحلـم بره يطيــر

نـــــــــــاسي تراثــــــــــــــــــــه 

ناســـــــــــي أســــــاســـــــــــه

ناسي يفكّـــــر مره براســــــــه

دا اللي خالقنـــــا داري بحالنــــا

طاب ليـــه جابنــا جوه بلدنــــــا

لمــا نفكّــر في العصافيــــــــــــر

تيجي غناويه علـي وتر الجــرح

وتعزف لحن ينـقّــط طــــــــــرح

واللي يحـسّر أشوف الصـــــوره

الناس بغنـاه فرحانـه مبــهــوره

يلم فلوســــه ويمشي يدنـــــــدن

وأفضــل أنـا حيراااااان حتجنـــن

كلـــــــــــــــــــه إتـفــــــــــــــرّق

إللي بيضحـــك وإللي يعلّــــــــق

ع الأغنيـــــــه وع الحدوتـــــــه

شايفهـــــــــــــا تســــــــــــــالي

وأنا أتحسّــــــــر ولا أتــأثـــــــر 

ولا أعدّي وأقول أنا مالــــــــــي

مافيش بيانولا داكان ف خيالـي

 

مجرد خاطره

أد إيه المصري جميل أصيل ونضيف أوي من جوّه طبعا بتكلم عن الفئه الحلوه ديه عارفه طبعا ان فيه العكس لكن موضوعي الناس الحلوه الناس اللي بتدمّع لما تفرح والاجمل لما دمعتها ديه تكون لفرح غيرها

دايما تلاقيها ف الفرح ووقت الشده. وجمالها في وقت الفرح مايقلّش عن جمالها في وقت الشدّه ودايما تلاقيها جنبك بالدعاء والصلاه اللي يمكن يكونوا مش مواظبين عليها في الايام العاديه

وياسلام لما تلاقيهم بيجروا هنا وهناك عشان يعملوا حاجه يادوب ممكن تفرحك مش حتي محتاجها

أد إيه الناس ديه جميله.....حتاخد إيه من ده غير ان قلبها بيفرح لما تفرّح غيرها

وهسلّط الضوء علي تجربه مرّت بيا من امبارح لناس من غير ماينووا حبوا يقفوا مع حد برده من الناس وبالرغم ان الناس ديه كل واحد فيهم له عيوبه ومشاكله مع التاني

لكن بمجرد ماجات الفرصه بيوتهم اتفتحت لبعض, شركات المحمول إستفادت منهم كتييييييير, الشوارع كانت فيها منهم اللي بيدور علي وسائل تكنولوجيه عشان تفرّح الانسان ده , وناس يمكن مش بتدخل بيتها إلا ع النوم اليوم ده رابطوا في بيوتهم بس عشان واحد منهم ماتربطهومش بيه رابطة دم لكن تربطهم بيه روابط تانيه يحسدنا عليها اللي بيفتقدها,ناس سابت مشاغلها وسابت دراستها وكتير أشكال كتير خلتني علي أد اليوم ماكان عصيب علي أد مافرحوني وأدخلو ا السرور علي قلبي وحسسوني ان فعلا الدنيا بخير

تحياتي ليكوا جايز مش أنا الحد اللي عملتوا كده عشانه لكن ولإني بفرح لكل واحد فيكوا زي مابفرح لنفسي لأ هوه الحقيقه أكتر بكتيييييير ما بفرح لنفسي فاللي شوفته منكم فرّحني وخلاني حاسه ان ده اتعمل معايا انا شخصيا

الناس ديه بعتز بيها وبرجو ربنا يجمعني بيهم في الفردوس الأعلي

لما قالوا الفجر شقشق

لماقالوا الفجر شقشق 

قلت أدقق ف النظر

يمكن ألقي الدنيا قلبت

والضباب أصبح قمر

بس الحق أقوله إني 

ماكنتش مصدق الخبر

يعني سواد الليل يعدي 

ألقي إتغير القدر

قلت يمكن نظري أضعف 

م النهار إللي اتعرف

بصيت ف وشوش الناس

إني ألقي لده أثر

الوشوش هيه الوشوش

والحجر هوه الحجر

لا الدنيا تتغير ولا الولا

يكبر يشب

يقوم من كبوته

وف ثانيه يبقي أب

دا القرار محتاج سنين

محتاسين إنت وأنا

والدنيا نازله فينا هز

وأفضل أنا برده أنا

ما الدنيا نازله فينا جرح

ولا يوم حتهز راية فرح

فحفضل أنا هوه أنا

ومهمن فجرك شقشق

إوعي تدقق

ساعات ويروح

ويطل الليل بسواده 

يزيد حيرة المجروح

حوار مابين الورقةوالقلم(2)

المشهد التاني: لكاميرا بتقرّب وتاخد الماستر سين لموظف... فين؟؟؟؟؟؟.مش مشكله فين...أصلك حتشوفه كتير وف أي مكان

الوش ........مكشّر 

المكتب ......هوه المكتب .....دوسيهات الناس الشقيانه عايزه إعاره عايزه إعانه, ست كبيره وعايزه معاش لولادها السته ,والمشكله مش في القرارات المشكله في التأشيره...يدوب يرفع بس الأستاذ المبجّل إيده بالقلم إللي هوه البطل عشان ينزل بيه ويأشّر علي الورقه إللي هيه البطله بس الحقيقه هوه بيفضّل بدل مايأشّر إنه يكشّروهنا يبدأ الحوار:-

كلاكيت أول مره حوار مابين الورقه والقلم ....أكشن أول مره

القلم :يارب الأستاذ ياخدني بقه نفسي أنزّل حبري علي ورق المصلحه بدل مابينزل علي ورق بس مصلحه تانيه ,مصلحته الشخصيه .

الورقه: إنت بتجيب في سيرتي؟؟؟أخيرا.. إيه خلاص قرر يمضي ؟؟؟؟؟

القلم : دا أنا إللي شكلي حمضي لحال سبيلي واتحول  لأشلاء الأنبوبه ف حته و جسمي ف حته والسن ف حته والحبر يجف وهوه لاحياة لمن تنادي

الورقه: ليه كده بس يعني من قلة الشغل ماأنت شايف أنا وإخواتي وكل عيلتي أهوه مترصّصين أدامك ع المكتب داأنا حتي مش شايفه 

وش الأستاذ من كترنا فوق بعض ف دوسيهات يعني الخير كتيرالحمد لله

القلم : أه كتير بس برده الشاي والفول والطعميه كتير وعلي مايخلّص أكل وشرب وطبعا ده الأهم عشان الشاي والأكل مايبردش كالعاده حيبقي اليوم خلص وأسمع صفارة الإنذار إللي بتقولي إنسي .. إنسي إنك تكتب حاجه ....وأسمعها تجلجل((((فوت علينا بكره ياسيد))))))

أكشن....

فركش......

وللمشاهد بقيه

من حق كل مواطنه تشتري لب!!!!!!!!!!!!!!

الدستور والقوانين في بلادنا العربيه تكفل لكل سيده مواطنه في بلدها انها تشتري لب أو سوداني بما إن المكسرات التانيه زي الفسدق واللوز ممكن تكون صعبه شويتين وخاصة بعيدا عن العيدين وفي ظل الظروف الماديه الراهنه والماضيه والمتوقعه كمان
لكن مع ذلك فالقانون كفلها انها تشتري لب وسوداني بدون ماتدفع من جيبها غير بعض الجنيهات ولحد كده وعاااادي لكن لحد ماتوصل انها تدفع من كرامتها واحترام انها انسانه ومسلمه فلحد هنا واستوب......
طابور ولا طابور العيش إدراك انها ست والمفروض يكون فيه احترام لده فمفيش
بلاش نقول صف وصف ولا حتي 10 صفوف رجاله وصف للسيدات لكن هذا الالتحام فهذا شئ غيييييييير تمام وقيس علي كده أي حاجه تدفع فيها فلوس معاها لازم تدفع السيدات من كرامتها والرجاله عفوااااا من دمها فين الدم.. فين الاخلاق.. فين حقي اشتري ابو 2جنيه من غير ماادفع غيرهم ولاّ الغلا صاب كل حاجه
وارجع اقول كفلّي الدستور ربنا يكرمه الحق ف اني اشتري لب

بين البينين

أحيانا.... وساعات كتيربيعيش الإنسان في حالةبين البينين!!! وبين البينين ديه حاله كده بين حالتين حاله مالهاش إسم بين حالتين لهم أسماء, لكن مش حقدر أقول عليها دي الوسط اللي هوه خير الامور,لكن هيه حاله بين صح وغلط احيانا, وبين شخصيه وشخصيه أحيانا أخري ,وبين تفكير ولا تفكير وبين فوق وبين تحت.....حاله غير واضحة المعالم غالبا بيلجألها اللإنسان وده لو كان قادر علي التحكم في ذاته فبيلجألها لما بيضطر يلاقي ردود لناس لما بيتسأل أو لما يسأل هوه نفسه عن ليه كده؟ أو إنت بتعمل ايه؟ أو بتعمل كذا ليه؟؟ وطبعا ولانه مش مخطط للحاله ديه ولا لنفسه عموما بتطلع اجابته بين البينين وكتير بتكون بين البينين وده الاصعب لما يعيش الانسان بين شخصيتين وياسلام لو الشخصيتين دول يكونوا متناقضتين ويوصفها من ناحيه مثل من بره الله الله ومن جوه يعلم الله وطبعا مش لازم يكون الانسان ده كده عشان منافق لكن يمكن عشان جواه شخصيتين بيتمرجح بينهم لاقادر يكون الشخصيه اللي ظاهره منه بره ولا قادر يفضل الشخصيه إللي جواه وساعات كتير تنطبع عليك شخصيه وتفضل علي طول مطبوع بيها وكأنها ختم وطبعا ماتقدرش تتملّص منها فتضطر تعيش فيها في وسط الناس لكن تيجي المأساه لما تبقي مع نفسك وتبدأ تظهرلك الشخيه التانيه!!!!!!!!!!!!!!!!!! وساعتهاحيبقي ادامك حلين ياإما تعيش في حالة بيني البينيين ياإما تشد في شعرك للصبححححححححح

حملة إحياء( يارب تصلح بيها قلبي )

الإسم إحياء والفعل لينا احنا والمفعول به هيه ملامحنا مش ملامح وشوش .. لا ماتخافوش ده المقصود قلوب ملامحها دابت دوب من نظره مخفيه متشافه من ربك فوق تنساها انت وهيه علي قلبك لفّت طوق من كلمه واتقالت وف بحرك اتشالت ياريتها بس ذنوب ...بتدوب الخوف تكون مكتوب وبيها القلب يتغلّف وتبات يومين تحلف مااقصدش والله من ذكر تاه معناه اذا قولته ف يوم تصبح تنساه قرآن مهجور متشال ع الرفوف نفتكره ف موت ...نفتكره ف خوف ياسلام ع الفرح وغناويه !!!! تلقانا ولا قرد ف خطاويه وودان تتشدوقلب ينط لصوت الست تقول مااحلاه هوه القلب خلاص بيعناه يفضل ايه من بعد القلب نعيش وياه طب ركعه ف ظلمة ليل تلحق بيها دي الكفه بتميل حياه ولهيانا شباب وبنات والقلب عليه الران طبقات ياقلوب بتراب مدهونه محتاجه تفوق محتاجه لنبته نزرعها وتشب لفوق نرويها بفعل الخير ياشباب القلب كبير ده خساره يكون مسجون أحزان ويكون مأسور للكره .... جبان بس خلاص الحل نعيّط ونقول يازمان!!!! ولاّ الحل ننام دلوقتي ونسرح ف الأحزان!! لا دا الحل اهو جاي معليّ ف راسه كمان بيقوّي القلب ومخصوص للإنسان إللي بنيّه وصبر وصحبه ينظّف كل الران حامله همومنا وبتسبّق بينا لرمضان إسمها إحياء فعلها بإدينا يهز ميدان

حوار مابين الورقةوالقلم

المشهدالأول:- لورقه بيضه مابيقطعش بياضها غير كام سطر يدوب ملّسوا علي نعومتها فاذدادت رقه ,تطل من بين اخواتها الورق وعلي مرأي ومسمع من والدها الدفتر شبّت في كامل حياءها وقالت للقلم ياقلم ممكن تكتب فياكلام ؟؟مش حابه أعيش كده فاضيه قال القلم: أخاف عليكي يجرحك سني دا انا سني رصاص يقتل ضحكت الورقه بحيائها وقالت ياقلم انا اللي يقتلني فضايا مااتخلقتش للفضي,اموت برصاصك بس تعيش الكلمه ,املاني ياقلم وان حتي ان سنك يوم وقتلني حيفضل مني اللي يقول عاشت..... وللحوار بقيه

علام بالكلام

أد إيه كلام اتقال من يوم مااتخلق سيدنا آدم تقدر تحسب....كتير مش كده؟؟؟؟... لكن أد ايه علّم !!كام من معلم علّم وكام من ألم علي ورق أو ألم علي خد أو ألم من تعب علّم طب كام من ورقه اتمسح بيها تراب الشارع وكام من ورقه اتحفظت جوه دفاتر وكام بقه من ورقه غيرت مجري حياة أمم!!!!!كتاب...مقال...شعر ...خطط... لاكان ساعتها الورق من أفخم الأنواع ولا الاقلام كانت ماركه كان يمكن ساعتها تكون الورقه ايدين اتنحتت فيها الحروف, اقلامهاتباشيره ولاّ عود طلعت عينهم علي مابروه والعين التانيه علي مايلاقوا الحبر ان شاالله هباب المطلوب مش نوع اقلام ولون احبارالمطلوب أفكار ودماغ مش عارفه تنام من حر مشاعر جوه قلوبها بتصرخ عايزه تريّح ضهرهاعلي سطور الورق ترتاح حبه وتتنطط باقي العمر من سطر لسطرمش طايقه السجن اللي اسمه دماغ, الكلمه حواربين أي اتنين الكلمه شعار لمعاني كبيره تطير وتطيروتغذّي كتير علشان بتطير من عقل مثقف او راجل عادي بس بيملك فكر او حتي كلام من تجربه طالعه من قلبه يصدقها العالم علشان ممزوجه بعرق الراجل ده أو شعر وقصه وغنوه وحكمه داقت ألم صاحبها فعرفت تعبر عنه الكلمه تعلم ,الكلمه تعوّر ,الكلمه تسمّع بين قطرين طب ليه ماتكونش الكلمه علامه أسيبها زي حمامه تطير وتروح لصاحبها ساعتها تفيده كتير وتفيدني كتير