اكشن تاني مره بس مش بنفس الكاميرا

ستوديو جديد ...لوكيشن علي أحدث صيحات هوليود ... فنانين من أقطار مختلفة 

قال المخرج أكشن أول مرة

ظناً منه إن القصة جديده والممثلين أول مرة يشوفوا بعض وديه حقيقه

خلّص كلمتة كلاكيت وإتلقطت الصور المتلاحقة السريعة جداً إللي هيه بيسموها فيلم

اتفض اللوكيشن روّحوا الممثلين قعد المنتج ويّا المخرج يشوفوا جودة تصوير اليوم الأول وروعة أفلام هوليود بألوانها الساحرة

حالة من الإستغراب والدهشه تسود المكان وعيون بتبص لبعضها بدهشة 

وهيه جملة واحده كسرت سكون الإستغراب والدهشه الصامته : ده فيلم قديم وحوارات متقاله قبل كده

حد فاهم حاجه؟؟!!

يوم عيشته وأنا صغيّر

دقيق.... مش مهم اد إيه
لبن وميّه .....برده مايهمش أد إيه
خميييييره .......  مش قولت مايهمش أد إيه:)
ماجوور.............مش مشكله عشان هوه كان اسمه كده:)
ودي المرحله الأولي ويوازيها حاله من الترقّب الشديد وعيون مرشووقه ف الماجور ياتري حيطلع منّه إيييه؟؟؟؟
طبليّه كبيييره وطبليّه أصغر وأحيانا 3 و4
ماجور متغطّي ببطانيه قديمه
إيد واحده بسسسس تدخل فيه نظيفه وزي الفل تطلع تدّي للإيد التانيه حتة عجييين ثواني وتبقي كوره وتتحط ع الطبليه ودقائق وتتنقل البطانيه القديمه من فوق الماجوور لفوق الطبليه اللي عليها الكور

وقبل ماتنتهي المرحله التانيه بنكون طبعاً واحنا اطفال وماأدراكوا بأطفال العيله لما تتلّم علي هذا المهرجان يووووم الخبيييييز:)
بالظبط بالظبط بنبقي صوره طبق الأصل من القطط حوالين أكلة سمك كله نفسه يمد إيده ويساعد ولكن كان الجميع يُقابل بهش القطط :)
لكن الحمد لله ماكنتش منهم كان ليا نصيبي إللي أكيد كنت بلعب بيه والحقيقه كان لحد قريب:)
يمكن عشان كده طلعت بحب الحاله ديه؟؟؟ مش عارفه 
وتأتي المرحله الثالثه
................................................................................................................................................................................................................................................................................................................................................................................................................................................................................................
هوه مش مكتوب حاجه فعلاً
لان المرحله ديه كانت سكوووون وهيه حاسه واحده اللي بتشتغل وهي حاسة الشم !!!!!!
لحد هنا وينتهي المهرجان
ومن هنا بدأت الليله أفتكر الحاله ديه شمّيت فحسّيت فحنّيت فقررت أكتب الحاله ديه
أجمل أيام وأتقن أداء وبجد أحلي ريحه:)

وبالهنا والشفا والجبنه الحادقه والعسل:)